фрыдрых фалевіч з сям’ёй

Гэта фатаграфія нашай сям’і. Злева направа, сядзяць: жонка майго брата Барыса Зіна Фалевіч, мая мама і я.

Стаяць: мае браты Ігар і Барыс, мая жонка Дора. Гэтая фатаграфія была зроблена ў Слуцку, у доме мамы, калі мы наведвалі яе, у 1980 годзе.

Мы з Дорай жылі ў невялікім драўляным доміку, які належаў бацькам Доры.

Жылая плошча хаткі складала каля 20 квадратных метраў, а жылі там шэсць чалавек. Мы сталі ў чаргу ў выканкаме на атрыманне кватэры, але прыярытэт у той час быў тым, у каго зусім не было ніякага кута для пражывання.

Наш дом быў маленькі, вільготны і стары. Усюды была цвіль, выкліканая вільгаццю. Цвіль была нават на вопратцы ў шафе.

У доме не хапала месца для сну, у ім было цяжка дыхаць. У 1963 годзе да нас прыйшла камісія для праверкі жыллёвых умоў.

Яны паглядзелі, дзе мы жывем, і неўзабаве мы атрымалі кватэру ў новым будынку недалёка ад цэнтра горада. Маме далі кватэру ў доме побач з намі.

Я атрымаў ключы ад нашай новай кватэры, і калі мы з жонкай ўвайшлі туды, мы заплакалі ад шчасця.

Яшчэ доўга пасля пераезду туды мы былі перапоўненыя шчасцем. Я часта наведваў маму, і падтрымліваў яе, як мог.

Мой старэйшы брат Ігар нядоўга прабыў у Слуцку пасля дэмабілізацыі. Яму прапанавалі ажаніцца з яўрэйскай дзяўчынай з беларускага горада Асіповічы.

Ігар ажаніўся з ёй і пераехаў у Асіповічы. У яго нарадзіўся сын. Яго звалі Яфім. Ігар не меў адукацыі і працаваў будаўніком. З Асіповічаў яны пераехалі ў Слуцк, а праз некаторы час перабраліся ў Мінск.

З Мінска яны пераехалі ў Ізраіль і пасяліліся ў Нетаніі.

Мой другі брат Барыс жыў у Слуцку. Калі я быў у войску, ён ажаніўся з Зінай, беларускай дзяўчынай са Слуцка. У брата было двое дзяцей.

Яго старэйшы сын Іосіф, названы ў гонар нашага бацькі, – аднагодак майго старэйшага сына, а яго дачка Марыя – аднагодка нашага малодшага сына. Паміж імі розніца ўсяго ў пару месяцаў.

У Барыса трое ўнукаў. Іосіф жанаты на рускай жанчыне Галіне.

У іх дзве дачкі. Старэйшая – Таццяна, малодшая – Ганна.

Марыя выйшла замуж за яўрэйскага хлопца. Яе прозвішча па мужу – Кулеш. У Марыі ёсць дачка. Нядаўна Марыя з сям’ёй пераехалі ў Ізраіль. Спадзяюся, у іх усё будзе добра.

Мой брат і яго жонка жывуць у Слуцку. Мой брат захварэў. Ён быў моцным і здаровым мужчынам, але ў яго жыцці было занадта шмат цяжкасцяў і цяпер на яго страшна глядзець.

Але з гэтым нічога не зробіш… Такое жыццё… У Слуцку з нашай сям’і засталіся толькі ён і я. Мама памерла ў 1986 годзе.